Lautein, 05 juñu 2025 (TATOLI)- Governu liuhusi Sekretáriu Estadu Komunikasaun Sosiál (SEKOMS), servisu hamutuk ho parseiru Child Fund, kinta ne’e, lansa portál ba jornál parede dijitál ba eskola 5 iha Munisipiu Lautém, ne’ebé hala’o iha Salaun NGO Fraterna, iha suku Fuiloro, Postu Lospalos-Vila, Munisípiu Lautém.
Eskola lima ne’e mak Eskola Sekundáriu Jerál Nino Konis Santana, Eskola Sekundária Jerál Lere Anan Timur, Eskola Sekundária téknika vokasionál númeru 1 no númeru 2 Lospalos no eskola Tékniku Agríkola Don Bosco Fuiloru.
Biban ne’e, Sekretáriu Estadu Komunikasaun Sosiál (SEKOMS), Expedito Loro Dias Ximenes, afirma jornál parede dijitál hanesan plataforma dijitál ida hodi fasilita informasaun husi eskola ba estudante, profesór no diretór eskola sira liuliu atividade eskolár nian.
“Ida-ne’e, hanesan plataforma ida ne’ebé estudante sira profesór sira no mós Diretór eskola sira bele akompaña husi profil eskola nian, atividade eskola nian, saida mak eskola hala’o no mós inan-aman sira bele hatene saida mak la’o iha eskola”, dehan Sekretáriu Estadu ne’e iha salaun Fraterna Lospalos-Vila, Munisípiu Lautém.
Lansamentu jornál parede dijitál ne’e, Sekretariu Estadu Expedito, afirma hamutuk ho childfund lansa iha eskola lima iha munisípiu referidu hanesan parte ida husi literásia dijitál atu estudante sira buka aprende iha kontestu oi-oin hodi hasa’e koñesimentu no kreatividade estudante nian iha eskola.
“Ita hotu hatene tanba saida mak ami ho child fund halo lansamentu ida ne’e, tanba dalabarak ita ko’alia literásia iha oi-oin, maibé iha ida ne’e ita koalia literásia dijital oinsa mak ita atu aprende dijitál liga ho jornal parede dijitál ne’ebe ita lansa dadaun ba eskola lima iha Lospalos ne’e”, katak nia.
Objetivu prinsipál governu lansa hanesan pilotu ida ne’ebé hahú iha eskola lima iha Dili no ohin eskola lima tan iha Lautém. Programa ne’e realiza tanba SEKOMS servisu hamutuk ho Ministériu Edukasaun ho parseiru ho Child fund kontinua ba eskola sira seluk iha territóriu.
“Ita introdús programa prinsipál ida-ne’e atu motiva estudante sira hodi buka aprende di’ak liu tan liuhusi plataforma dijitál ne’e ba informasaun loloos no husu estudante sira uza ho loloos no saudavel”, nia sujere.
Iha fatin hanesan, Diretora Child Fund, Alzira Dos Reis, reforsa plataforma ida- ne’e bele promove literásia dijitál ba estudante no joven sira oinsá uza internet ho seguru no saudavel no asesu informasaun ne’ebé kredivel
“Uluk ita dehan jornal parede katak tesi jornal sira hodi taka iha parede sira, ohin ita lansa jornal parede dijitál ho klik ida ita bele asesu ona informasaun sira liu husi internet liuliu kreatividade la limite ita boot sira bele asesu informasaun iha ne’ebé ho lais”, nia afirma.
Tanba ne’e, Resposavél ne’e sente kontante tebes bele servisu hamutuk ho Governu liuhusi SEKOMS, Ministériu Edukasaun no mós eskola alvu sira ba plataforma ida ne’ebé la’ós hatudu talentu deit, maibé ajuda estudante sira bele aprende mós.
Profesór no estudante agradese ba SEKOMS
Entretantu, Profesór Eskola Sekundáriu Tékniku Vokasionál númeru 2 Lospalos, Jorge da Costa, agradese ba Governu ne’ebé inisia plataforma ida-ne’e tanba bele benefisia tebes ba estudante sira no mós ajuda profesór sira bele fahe informasaun ba estudante ho lais.
“Hakarak agradese programa ida ne’e tanba primeira vez no ho benefisiu boot liu ba estudante liuhusi jornal parede dijitál ne’ebé bele hafasil di’ak liutan no hetan matéria liu husi telefone android ne’ebé estudante ida-idak uza”, nia agradese.
Estudante Estefania Monica Lopes, mós sente kontente ho lansamentu jornal parede dijitál ne’e no nia sujere atu kontinua formasaun ba sira, nune’e implementasaun jornal parede dijitál ne’e la’o ho di’ak no bá oin nafatin.
“Ami sujere atu kontinua fó formasaun mai ami, nune’e implementasaun jornal parede dijitál ne’e la’o bá oin nafatin”, nia hato’o.
Jornalista Anito Soares
Editór: Florencio Miranda Ximenes
Fonte Notísia : https://tatoli.tl/2025/06/05/governu-lansa-jornal-parede-dijital-ba-eskola-5-iha-munisipiu-lautein/
Leave a Reply